Produktua

Euskadin, Kalitateak erregistratu eta homologatu dituen ustiategietan ekoitzi diren sagarrak bakarrik erabiliz egiten da Euskadiko Sagardo Naturala.

Sagardo naturala da, alegia, sagar freskoaren edo haren muztioaren hartzidura alkoholikotik sortua. Modu tradizionalean egina dago eta ez zaio gasik edo azukrerik gehitzen.

Euskadin ekoizten eta botilaratzen da, eta bere gutxieneko alkohol-edukia 5 gradukoa da.

 

Ekoizpen-prozesua

Bilketa eta garraioa

Sagardoaren ekoizpenak irailaren amaieratik azaroaren erdialdera arte irauten du. Lehenik, eskuz aukeratzen eta biltzen dira sagarrak.

Sagarrak osasuntsuak izan behar dute eta beren heldutasun-punturik onenean bildu behar dira. Sistema egokien bidez garraiatu eta biltegiratu behar dira, frutaren hasierako kalitateari bere horretan eutsi ahal izateko.

Birrinketa eta prentsaketa

Sagardotegiak Euskadin inskribatuta eta kokatuta daude, eta Eusko Labelaren barruan erregistratuta dauden sagarrak bakarrik ekoizten dituzte.

Lehenik eta behin, sagarra garbitu egiten da. Aukeraketa eta garbiketa egin ondoren, sagarrak birringailuan edo "matxakan" sartzen dira. Makina horren eginkizuna sagarraren mamia lehertzea da, prentsaketa errazteko eta lehengaiari ahal den etekinik handiena ateratzeko.

Prentsaketatik muztio preziatua ateratzen da hortik, hartzitu ondoren sagardo natural bihurtuko dena. Jarraian, dagokion kupelean sartzen da muztioa, hartzidura-prozesua has dadin.

Hartzidura, Heltzea eta Egonkortzea

Hurrengo bi asteetan, muztioak bere lehen hartzidura izango du, hartzidura alkoholikoa deritzona. Prozesu horretan, azukreak alkohol bihurtzen dira gehienbat; bigarren mailako konposatuak direlakoak ere sortzen dira, sagardo naturalari zapore eta usain gozoa ematen diotenak.

Azterketa

Kalitateak produktu-azterketa ugari egiten ditu hainbat laborategi eta unibertsitatetan. 15 ezaugarri aztertzen dira guztira, besteak beste azidotasuna, alkohol-maila, Ph, azido malikoa, azukreak, errautsak eta fenolak.

Azken proba, ordea, Kalitatearen kalifikazio-batzordeak egiten du. Batzorde horrek produktua dastatzen du eta bere ezaugarri organoleptikoak balioesten ditu, ikusmenaren, usaimenaren eta dastamenaren aldetik.

Botilaratzea

Hainbat hartziduraren ondoren sagar-muztioa sagardo bihurtu denean, sagardogileak eta Kalitateko teknikariek erabakiko dute produktua botilaratzeko unerik egokiena zein den.

Sagardoa botilaratzeko teknologiak asko aurreratu dira, eta gaur egun, sagardotegi guztiek azken belaunaldiko makinak dauzkate botilaratzeko.

Etiketatzea

Eusko Labela duen Euskadiko Sagardo Naturala Kalitateak onetsitako botila batean ontziratzen da. Horri esker, produktua erraz identifika daiteke, eta behar bezala babestuta dago argiak hondatu ez dezan.

Ziurtatutako produktuaren identifikazioa eta etiketatzea ere Kalitateak gainbegiratzen ditu. Zenbakituta eta kontrolatuta dauden etiketak erabiltzen dira horretarako.

 

Saltokia

Eusko Labela duen Euskadiko Sagardo Naturala botilatan merkaturatzen da beti, eta zenbakitutako etiketa berezi baten bidez identifikatzen da.

Benetako Euskadiko Sagardo Naturalak bakarrik darama Eusko Labelaren logotipoa. Produktu honek, ondorengo ezaugarriak dituen zikloa ixten du:
- gure ingurunearen zainketa eta Euskadiko landa-jardueraren babesa,
- gure baserritarrek egiten duten lanaren onarpena,
- produktuaren kontrola eta kalitatea,
- eta kontsumitzailearen gogobetetasuna.

Euskadiko Sagardo Naturala
%100 Eusko Labela,
%100 bertako sagarra.

HAZI // Muntsaratz, 17 // 48220 Abadiño - Bizkaia